浦東柏雅居服務公寓
Posted under: 今次入住的是浦東區的浦東柏雅居服務公寓，我們訂的是一千六呎的三房單位，五個人住得非常鬆動舒適。
房間可直接至電酒店預訂，好處是可入住時才付款，其它 agent 可能會有更好的 offer，不過 No Show 的話會有罰款。
酒店離地鐵 4, 6, 9 號線 (世紀大道站）約七、八分鐘步程，出入尚算方便，惟酒店位於內街，的士司機不一定認識，
大家只需請司機去東方路 瑞吉紅塔大酒店 (The St. Regis Shanghai) , 這家大酒店所有上海司機都認識的，然後沿向城路第一個路口左轉便到了。
View Belgravia Serviced Residence in a larger map
房間乾淨企理，當然說不上很豪華，一家大細住，我們已是非常滿意。
酒店七點起開始供應早餐，好像是三十元一位，如果你一早要去世博園區的話可能來不及在酒店吃早餐了。
附近有二十四小時營業的便利店，再遠一點有永和豆漿和老麥。晚飯附近亦有很多不同的選擇，但我上海的朋友不建議去蘇浙匯。
房內有有線上網服務 （即是只得一個port 位連接一部電腦），收費為五十元一天。我之前購入的聯通 3G sim card 和 pocket Wi Fi 總算大派用場。
最後一提, 便利店傍便是和中堂，行世博行到腳斷可以去做個腳底按摩舒緩一下, 營業至零晨二時。
還是老話，有圖有真相：
世博自由行經驗分享
如果你有外國朋友泥香港shopping, 你會唔會叫佢上午行哂上環到銅鑼灣既名店，下午再殺埋尖沙咀至旺角既店鋪仔呢？
Be realistic, 一日係行唔哂世博既，如果你好精力充沛唔介意不停排隊同行路，兩日都會好趕，三日既行程係會比較理想。
我地一家五口，兩大, 兩細 (七歲 , 五歲) 再加上嫲嫲係五月中去左兩日世博園區，以下係小小經驗同大家分享，
Disclaimer
1. 我地五月去果時係咁, 唔等於你去果時都係咁，緊記，一切只供參考。
2. 始終我地又有小朋友又有老人家, 佢地既體力同我既忍耐能力真係低到你估唔到, 相信你地可以早D起身出發, 玩得夜D先番酒店, 排隊可以排得耐D, 食飯又食得快D, 最緊要係望見到果條人龍仲有勇氣排落去! (我就係見到條人龍已經萬念俱灰, 映下相算數) 所以，緊記，一切只供參考。
FAQ – 我知你一定會問，所以答定先：
- 係！真係好多人。
- 冇，我地去唔到中國館，預約唔到。係，團體票唔係包生仔一家去到中國館既。
- 我地去左育樂灣，可口可樂館， 日本產業館，韓國企業聯合館，漢堡案例館，羅阿案例館，瑞士館，西班牙館，丹麥館，非洲聯合館，中國館＊
- 我地係向在淘寶既尊尊旅行社訂既團體票，經過今次的經驗，我唔會推薦呢間旅行社，亦唔覺得買團體票有好大的優勢。
- 我覺得好值得去，特別係同小朋友去見識吓，真係值得。真心既，你唔信我都冇辦法。
[youtube]http://www.youtube.com/watch?v=cz314rfRGj8[/youtube]
真係好值得去，真係好好玩！
人啊！人
係，真係好多人！
我去果兩日據官方公報既入場人數係 290,600 (19-5-10) 同 328,500 (21-5-10)。
我已經覺得係人山人海，浦東區幾乎所有場館少則排45分鐘，熱門場館要排成兩個鐘以上！
如果去到暑假好似官方預期每日有超過四十萬人入場的話，排隊時間可能會更長，大家一定要有（中暑既）準備。
交通
世博的士是係你既好朋友，出入園區最好都係坐的士。又大又新淨, 後面又有大行李箱，我回程時去機場都係叫世博的士。
原先問話只可坐四人，小童都當大人計，搞到我都好頭赤, 點知去到上海后又話坐五個人冇問題。(可能係小朋友關係）。
Anyway, 大家都係自己問清楚，而且五個大坐人又真係有少少迫。
出發前可以事先至電 96822 call定車到酒店接你，世博的士可以直接去到園區入口, 比地鐵要方便得多。
回程時call 車都冇用，因為人太多，司機根本搵唔到你，幸好浦東區6 7號 (對唔住，之前寫錯左，係7號出口，sorry sorry) 出入口，浦西區1，3 號出入口有的士站，唔駛call 車，去到排隊就得。
如果大家打算地鐵出入，不妨買定張上海公交咭，好似八達通咁，二十元按金當買個記念品囉，我 21/5 因為落雨去唔到 6 7 號出入口搭的士，又唔夠內地同胞勇猛搶唔到的士，唯有同幾百人迫係耀華路地鐵站搭地鐵番酒店，結果淨係排隊買地鐵飛都排左近30分鐘！真係灰爆。仲有，請預備足夠硬幣散子, 排到去部機度佢先話冇哂散子唱所以只收硬幣, 你係會想自焚既.
世博護照
如果大家有興趣買本世博護照在展館中蓋章的話，請出發前在網上預訂好，我在園區被人問得最多的問題係：
“請問你本世博護照邊度買？”
“你可唔可以賣本比我呀唔該！”
園區內係買唔到世博護照架，I repeat,
園區內係買唔到世博護照架!
天氣
21/5 日既天氣係：
上午：小雨, 18度 左右，有D涼
中午：好猛太陽，好熱
晚上：落狗屎，好涼
OK, 你知你要帶咩啦！
個人推薦吉之島十蚊店雨衣，有唔同size，有藍白兩色，大風當風褸都頂到下，據網友講園區內雨傘賣80一把, 小心。
*我地真係冇去到中國館參觀，不過有個有心人放左我入去蓋章，在此再三感謝有心人。
打住咁多先，真係打得好辛苦! 跟住同大分享園區內既飲飲食食.
世博護照
今日下午在 Twitter 上看到明報有這篇世博護照成受歡迎商品的報導，大意如下：
聰明的你當然明白我會做咩，八本世博護照日內送到，到時同大家分享。
P.S
原來店主都係香港人，去左上海賣世博紀念品，世博護照都比你諗到，抵你發！
30 May 2010 更新：
BK 上有不少朋友問怎樣訂世博護照，就我所知網上有三家店鋪出售：
http://shop61249030.taobao.com/
我便是在這家訂購的，店主是香港人。
另外有一家世博商品官方旗舰店，除了世博護照外還有不少其它的世博紀念品，我有一些送給小朋友同學的紀念品都是直接在這裡買的，個人推薦证件挂带和世博特別版大富翁 (世博大亨棋），特別是世博特別版大富翁，非常大盒，原先大富翁中的街道店鋪變成世博會的場館，超讚！
不過我自己對這家店鋪的評價幾差，發貨超慢，CS 問十句答一句，仲寸你唔好成日崔佢！
大家要預多 D 時間訂貨。
最後一間都係網上 forum 介紹，不過好似因為供不應求，已暫時停止接受訂購世博護照，你話死未？
http://www.dowexpo.com/dw/web/index.htm
又，唔少人問點係淘寶訂野，唉，呢樣真係一言難盡，大家去呢個網睇睇啦，一次生兩次熟，連我都學得識，又有幾難？