烹飪比賽
Posted under: 
爸爸放長假的最后一天, 早上一家人到歷史博物館和科學館參觀, 下午喆喆午睡, 我們和正正到樓下的YWCA參加親子烹飪比賽, 所謂比賽只不過是一共四個家庭參加, 各家庭都會被指派制作一款食品, 除此以外還要編寫一個和這款食品有關的故事…
由於正正是四個組別中年紀最小的小朋友, 特別照顧下所以我們被派制作最簡單最無技考的食品 – 曲奇餅…
試想連麵包都會了, 區區曲奇餅又怎會難倒我們? 食材無可發揮, 於是我們便挖盡心思寫了個極盡浮誇的故事. 最后這個原本是五環形的曲奇餅變成一整片的曲奇竟然得到(雙)冠軍!
喆喆就無得玩啦!
星期三, 正正放假上烹飪班和奧數班, 我也難得請到半天假陪兩個小朋友玩.
早上先帶他們去麥當勞吃早餐,送正正上堂后就帶喆喆去公園將星期日整的麵包餵魚,可憐我挨更抵夜整的麵包竟然落得這個下場! 上次正正去意粉屋食排骨頭后成日話好想再食,本來打算同佢去Ruby Tuesday 食ribs, 不過價錢實在太貴了, 結果又去多次意粉屋食排骨頭!
食完飯,喆喆自然要訓覺, 我就同正正去游水, 三十四度高溫下, 實在沒有什麼戶外活動比游水更合適了.
游了個多小時,正正玩得十分盡興,最好笑是, 他竟然一面得戚的說: “喆喆就無得玩啦!”
兩兄弟的性格就是這樣南轅北轍, 正正最怕細佬分薄了大家對他的寵愛, 最怕我趁著他返學就帶細佬到處玩, 細佬剛剛相反, 一有得玩弟一時間就穩哥哥一齊玩.
麵包工房 – Basic Soft White Sandwich Loaf
由於上星期弟一次整麵包效果唔錯, 今個星期又再接再厲, 今次仲特登係圖書館借左本 The Bread Bible, 學用中種發酵法, 希望效果比上一次會更鬆軟. 因為要經過多次發酵, 下午二點預備的麵糰要到晚上九點多才可以整型入爐. 誰不知原來看錯了食譜, 將牛油太早加入麵糰,以至發酵不成,整盤麵糰作廢.
本來就咁就算數, 不過眼見正正好想食麵包, 於是又把心一橫重新再由中種做:
22:00 重新做中種
00:30 中種弟一次發酵完成, 加入餘下麵粉
02:45 弟二次發酵完成, 開始搓麵糰
04:15 麵糰已經漲大了一倍, 本來應再搓一次麵糰, 醒麵,然后定型…不過我己經不醒人事
06:30 一覺醒來,麵糰又再發大一倍,因為趕在正正出門番學前食到新鮮麵包, 所有后期工序都取消, 匆匆入爐
07:40 兩款不同做型麵包終於出爐,香味四溢!
08:00 爸爸媽媽姐姐吃掉了整條麵包, 還吩咐姐姐千萬不要讓小朋友吃,因為怕吃壞肚子!
10:15 爸爸和喆喆到公園餵魚, 公園的金魚覺得爸爸整D麵包好好食!
相煎何太急
一直都想記錄低最近一段時間管教正正的問題.
很多朋友都會問: “你錫正正多點還是錫喆喆多點?”
我常說,當然是正正!正正是老大, 又淘氣,很多事情我們都沒經驗,打了再說.
結果正正挨了不少冤枉打,我們在他身上學習了管教之道. 喆喆再犯同樣的毛病,我也寬容得多了. 大家心裡都會說, 不要緊, 不要勞氣, 正正當年都是這樣的…
這幾個月吧, 我常常責罵正正, 向他說很難聽的說話, 有時火遮眼還會打他. 責罵的原因不外乎是唔專心, 坐唔定, 手多多, 四圍走, 同細佬玩得太顛, 尿床, 無時間觀念, 食飯只顧看電視, 唔幫手照顧細佬… 真是罄竹難書.
總之一句到尾就係唔聽話!
打完罵完, 我自已也(例牌)很自責,很后悔. 我發覺我們近來對正正說得最多的一句話可能是–正正你大個仔啦!
正正你大個仔啦! 所以你應該要點點點..正正你大個仔啦! 所以你要咁咁咁…
正正其實只是個四歲半小朋友, 只不過是我們把他當成個縮小大人看待罷了.
那天和Phyllis 說起, 平時在小朋友面前不好好控制情緒, 大吵大鬧, 郁手郁腳. 然后等佢訓左三更半夜係blog度大寫親子情懷如何如何大樹菠蘿其實真係好冇意思.
不過好多時候都是知易行難, 就好像今天的情況:
我們參觀完科學館, 到元氣壽司吃午飯, 喆喆本來好乖,吃了大半杯蒸蛋, 食再少少炸蝦壽司時, 一下就嘔到成身成褲成地都係! 清潔后重新餵過, 點知臨埋單前又再嘔一次! 埋單時我塞左十幾蚊貼士,可想而知情況有幾惡心. 好彩今次係坐order台, 無咁多人見到! 上次正正係沙田元氣食左八碟壽司跟住對住運輸帶當場嘔晒出泥果D先叫經典!
之后番沙田, 我帶正正去CitySuper 買整麵包材料打算下午整麵包. 行左一陣, 機場富豪打電話泥Confirm八月booking. 我講左三分鐘電話, 然后見到正正係CitySuper裡面除低左條面褲話:
“爸爸爸爸,我痾左屎呀!”
於是我將佢由L2一路拖行到屋企, 足足洗左大半個鐘先叫做清理完畢. 廣東話有句俗語叫「一褲都係」就係專門用泥形容呢種慘劇.
大家可能覺得好好笑,好似笑話咁聽. 但係我想同大家講,當時我真係好想一巴一巴咁打死佢.
正正好奇怪, 有D野你漫不經心咁隨口講下,佢又會記得一清二楚 (某月某日係星期幾), 有D野你同佢講十萬九千次都唔會入腦 (如果要大小便要早D講, 唔好最后一秒先至出聲..)
最后我心情平伏下來, 向正正了解情況, 我要正正向我道歉, 保証以后不會至發生這樣的醜事. 我也向正正道歉, 因為我講電話時沒有聽到他說要去洗手間. 然后我問正正還想不想做麵包, 與是我們又重新去CitySuper 買整麵包材料..
之后的幾天, 我和媽媽仍然因為種種瑣事責罵正正, 我們都知道這樣不對,但是…唉
正正其實是個聰明又感性,活潑好動,心地善良的四歲半小朋友, 很多時候只是我們對他要求太高, 常常要他充當大人的角色罷了. 正正,正正, 爸爸對唔住.
現在半夜兩點多我仍挨眼訓將這些經歷寫出來, 是對自己的警惕, 亦希望與睇Blog的你分享. 做人父母甚艱難, 大家加油, 大家共勉!
整麵包
正正最近的專題研習是食物,而紅組小朋友則選擇整麵包.
一連數日, 正正放學回來都很熱心的介紹他們一組小朋友整麵包的進度.
最初他們連整麵包的材料/份量都不清楚 (試過一碗麵粉加一碗鹽!)到后來不斷探索(訪問老師,參考食譜),正正可以一字不漏的背出做麵包的八樣材料:
- 麵粉
- 水
- 雞蛋
- 發粉
- 酵母菌
- 糖
- 鹽
- 朱古力粉
眼見正正好有興趣整麵包, 爸爸當然技癢要表演一下廚藝. 老實說,這還是我第一次整麵包,還好家中有本Jamie Oliver 的 Jamie’s Kitchen. 參考了裡面的Basic Bread Recipe, 還加入了我最喜愛的合桃和葡萄乾. 效果嘛,還是不錯的,原本以為會做出軟綿綿的麵包,沒想到質感倒像硬豬包. 我還特別為正正做了個”正”包.
