大澳遊

Please specify a Flickr ID for this slideshow



正正今年第一個 term-break,爸爸特別放幾日假陪佢。

原先打算陪正正去南丫島,後來一諗去南丫島仲可以行山,不如等埋媽媽聽日放假同埋喆喆一齊去好了,臨急臨忙之下就決定去大澳。

雖然我地時不時都會去大嶼山,但都係去機場同東薈城 ,爸爸都好多年冇去過大澳囉。

原來去大澳除左由東涌坐車入去之外,正正仲提供左旺角火車站有59X 巴士去屯門碼頭總站,然後可以轉富裕小輪去大澳, 不過平日計D班次就好疏下

雖然正正好想坐船,但因為時間好難就,結果都係去到東涌後再轉11 號巴士到大澳。

到左大澳已經係中午,大家都肚餓了,於是同正正去左橫水渡小廚,兩仔爺叫左個墨魚餅,魚湯浸生菜同埋銀魚仔豬頸肉焗荷葉飯,都係D大路野,墨魚餅又乾又削,失敗!其他兩個菜反而都好OK.

食完飯正正已經急著要出海睇中華白海豚,我怕佢一食完就上船會嘔得好勁,於是就係通街試維行,順便又買下手信。結果又買左一堆咸魚干呀蝦糕呀蝦醬呀酸梅呀草帽呀咁!

終於都出海睇海豚,由於係平日,跟本冇咩人會出去,我地兩個人用50蚊 “包左” 隻船出去,  (原價係大人20蚊,小童10蚊) ,船家在內水道略略介紹一下大澳特色的棚屋,跟著就車左出海,誰不知當日海面有點兒風高浪急,嚇得正正大驚,不停話要返去,船家亦老實不客氣,話咁大浪D海豚多數都唔出泥囉,二話不說就返歸,真正出海時間一來一回加埋都冇十分鐘。十分搵笨。

上岸之後又四圍搵野食,多方打聽之下總算搵到名震大澳既茶果財,果然係名不虛傳,好味到呢…..

可能係正正食得太過滋味 (大家睇下段片見正正食到一面都係粉就知有幾好食),財叔睇唔過眼,又特登整左個別注版既糯米滋比佢食,真係非常多謝!

今次大澳一日遊我同正正玩得真係好開心,下次同喆喆泥可以搭一程昂平360,然後由昂平去大澳,相信會比起今次會更好玩!