考車牌
Posted under: 
終於泥到大審判日！
出發去學校前，因為平日比較少行大涌橋線，我仲特別打的行左一轉沙角街，見有死車同修路，即係一路右線到尾cut番左轉番學院啦！
我安排左兩節操車，呀Sir話先出去，番泥再泊位，唔係難預時間，好合理。
去左轉安睦河畔，我話想番去泊位調頭，呀Sir話有時間，又去左轉銀城A, 結果番到學院只係試左兩次泊位調頭就話夠鐘，兩次調頭都唔係好好， 我已經好驚，結果中期試部份呀Sir話我調頭差少少就上博，我心諗，唉，你仲好講。
可能考官見我調頭咁屎，一出學校門口就同我講一路直去，我地去轉河畔。
講真，我又真係冇頭先調頭咁驚，河畔大大話話行左20次有多，一路都冇咩特別，有死車，有對頭車，油站位有位小巴大佬見我考牌都特燈讓比我行先，真係大恩大德！考官就好似好急咁不停望錶，去程時佢都不停比行車指示，回程時佢問我識唔識番學院，我話識，佢話，番學院！於是一路無話去到沙田圍路，佢再比指示，轉左，入左牛皮沙街就佢就再話，番學院。
番到去，我個心都係十五十六，我自覺考得唔錯，不過河畔有太多野可以肥人，最後pass左，黃紙一共11個細tick，相信係落雨考官都手鬆D, 另外可憐我一把年紀先學車，放我條生路掛。
好多謝我太太同家人比我既支持，好多謝駕駛學院的謝Sir，幫我補鐘既兩位師傅。
我最想最想多謝既係我細佬，佢唔單止陪我走過好幾轉考試路線，一早買定個P牌比我，最重要係佢當日一句說話點醒左我：
我話：“嘩！學車要成萬銀咁貴都係咪搞我！”
佢話 ：“大佬，一萬銀學一樣你畢生受用既技術點解你會覺得好貴呢？”
如果唔係我細佬，我呢一世都唔會的起心肝學車！
多謝你！細佬！
No related posts.
Tags: 駕駛樂